कुंडेश्वर अपघात: खेड तालुक्यात मुख्यमंत्री सहायता निधीतून मृतांच्या कुटुंबीयांना प्रत्येकी चार लाख रुपयांची मदत....
खेड: खेड तालुक्यातील कुंडेश्वर-पाईट गावाजवळ झालेल्या दुर्दैवी अपघातात मृत्यूमुखी पडलेल्या महिलांच्या कुटुंबीयांना मुख्यमंत्री सहायता निधीतून प्रत्येकी चार लाख रुपयांची मदत देण्यात आली आहे. ही मदत संबंधित व्यक्तींच्या वारसांच्या बँक खात्यात जमा झाल्याची माहिती खेडचे तहसीलदार प्रशांत बेडसे यांनी दिली आहे.
कुंडेश्वर देवस्थानकडे जाताना झालेल्या या अपघातात 12 महिलांचा मृत्यू झाला, तर काही जखमी झाल्या होत्या. या घटनेनंतर शासनाने तात्काळ मदतीची घोषणा केली होती. त्यानुसार, मृतांच्या कुटुंबीयांना प्रत्येकी चार लाख रुपयांची मदत देण्यात आली असून, ही रक्कम त्यांच्या वारसांच्या खात्यावर जमा करण्यात आली आहे.
तहसीलदार प्रशांत बेडसे यांनी स्वतः गावकऱ्यांची भेट घेऊन त्यांना याबद्दल माहिती दिली. यावेळी,महसूल नायब तहसीलदार राम बिजे, मंडळ अधिकारी मनीषा सुतार, ग्राम महसूल अधिकारी प्रतिभा कसबे उपस्थित होते,
अपघातात जखमी झालेल्या सर्व व्यक्तींच्या उपचाराची संपूर्ण जबाबदारी शासनाने घेतली असल्याचे सांगितले. तसेच, जखमींवर योग्य आणि परिपूर्ण उपचार होतील, यासाठी शासन पूर्ण लक्ष देत असल्याचेही त्यांनी स्पष्ट केले.
शासनाची संवेदनशीलता आणि कार्यतत्परता
गावकऱ्यांनी शासनाच्या या भूमिकेवर समाधान व्यक्त केले आहे. शासनाने दाखवलेली संवेदनशीलता सर्वांना भावली असून, प्रशासनाच्या कार्यतत्परतेबद्दलही नागरिकांनी समाधान व्यक्त केले आहे. हा अपघात अत्यंत दुर्दैवी होता, मात्र शासनाने या परिस्थितीत सर्वतोपरी मदत करण्याची भूमिका घेऊन तात्काळ कार्यवाही सुरू केल्याने गावकऱ्यांना मोठा दिलासा मिळाला आहे.
